3:29 pm - Tuesday September 19, 2017

தமிழர் தாயகத்தில் ஏராளமான பௌத்த தொல்பொருள் இடங்கள்!! பாதுகாக்க நடவடிக்கை!

வடக்கு கிழக்கு மாகாணங்களில் ஏராளமான தொல்பொருள் ரீதியில் பெறுமதி மிக்க பௌத்த வரலாற்று முக்கியத்துவம் மிக்க இடங்கள் இருப்பதாகவும் அவற்றை பாதுகாக்கப்பதற்கு சிவில் பாதுகாப்புப் படையினரை அமர்த்தவும் ஜனாதிபதி மைத்திரிபால சிறிசேன தீர்மானித்துள்ளார்.

வடக்கு, கிழக்கு மாகாணங்களில் உள்ள சிங்கள பௌத்த தொல்பொருள் இடங்களை தமிழர்களும் முஸ்லீம்களும் இணைந்து அழித்து வருவதாக பொதுபல சேனா உட்பட சிங்கள பௌத்த பேரினவாத அமைப்புக்கள் ஜனாதிபதியிடம் நேரில் சந்தித்து முறையிட்ட நிலையிலேயே இந்த தீர்மானம் எடுக்கப்பட்டுள்ளது.

ஜனாதிபதியுடனான இந்த சந்திப்பில், சங்கைக்குரிய எல்லாவல மேதானந்த தேரர், கலபொட அத்தே ஞானசார தேரர் நீதி மற்றும் புத்தசாசன அமைச்சர் விஜயதாச ராஜபக்ச, அமைச்சுக்களின் செயலாளர்கள், தொல்பொருள் பணிப்பாளர் நாயகம் கலாநிதி செனரத் திசாநாயக உள்ளிட்ட அதிகாரிகளும் கலந்துகொண்டனர்.

தொல்பொருள் திணைக்களத்தின் நடவடிக்கைகளை முறையாகவும் வினைத்திறனுடனும் மேற்கொள்வதற்குத் தேவையான உட்கட்டமைப்பு வசதிகளை அபிவிருத்திசெய்வது தொடர்பாகவும் விசேட கவனம் செலுத்தப்பட்டது.

தொல்பொருள் பெறுமதிவாய்ந்த வரலாற்றுத் தளங்களைப் பாதுகாப்பதற்கு ஒன்றிணைந்த நிகழ்ச்சித்திட்டம் அவசியம் என்று ஜனாதிபதி மைத்திரிபால சிறிசேன தெரிவித்தார்.

ஜனாதிபதி “தற்போது அச்சுறுத்தலுக்கு உள்ளாகியிருக்கும் பாதுகாப்பற்ற நிலையில் உள்ள தொல்பொருள் பெறுமதிவாய்ந்த இடங்களை கண்டறிந்து அவற்றை பாதுகாப்பது அவசியம். குறிப்பாக வடக்கு கிழக்கில் தொல்பொருட்களுக்கு பாரிய அச்சுறுத்தல் காணப்படுகின்றது. அது தொடர்பில் அவதானம் செலுத்த வேண்டும்.

புத்த சாசன அமைச்சு, கலாசார அமைச்சு, சட்டமும் ஒழுங்கும் தொடர்பான அமைச்சு, பாதுகாப்பு அமைச்சு, உள்நாட்டலுவல்கள் அமைச்சு ஆகிய அமைச்சுகளின் பிரதிநிதிகள், மாவட்ட செயலாளர்கள், பிரதேச செயலாளர்கள் மற்றும் மக்கள் பிரதிநிதிகள் உள்ளடங்கிய ஒரு குழுவின் மூலம் இந்நிகழ்ச்சித்திட்டத்தை நடைமுறைப்படுத்துவது குறித்து கவனம் செலுத்தப்படும்.

இன வேறுபாடுகளின்றி இலங்கையர்கள் என்ற வகையில் எமது கீர்த்திமிக்க மரபுரிமைகளைப் பாதுகாத்து எதிர்கால தலைமுறைக்கு வழங்குவது தொடர்பாக அனைத்து இனங்கள் மத்தியிலும் உளப்பாங்கு ரீதியான மாற்றத்தை ஏற்படுத்த வேண்டும்“

இதேவேளை, திருகோணமலை, வவுனியா மற்றும் மட்டக்களப்பு மாவட்டங்களிலேயே பௌத்த மதத்துடன் தொடர்புடைய தொல்பொருள் பெறுமதிவாய்ந்த இடங்கள் சேதமாக்கப்பட்டுள்ளதாக நீதிய அமைச்சர் விஜயதாச ராஜபக்ச தெரிவித்தார்.

இந்நிலையில், தெற்கில் எந்தவொரு கோவில்களோ பள்ளிகளோ தாக்குதலுக்கு உள்ளாகவில்லை எனவும் எனினும் பௌத்த மதவழிபாட்டுத் தளங்கள் மீது தமிழ் பேசும் மக்கள் தாக்குதல் நடத்துவதாக ஞானசார தேரர் இந்த சந்திப்பின்போது குற்றம்சாட்டினார்.

Filed in: கலை | கலாச்சாரம், செய்திகள், பிரதான செய்திகள்

Comments are closed.